Proiektuak BIDERATU Modelizazio-Sistema Integratua deritzon modelizazio eta plangintzarako tresna garatuko du, eta honek, inpaktuak bereizita ebaluatuz, deskarbonizaziorako bideak sortu eta hautatzeko irizpideak eta informazio kuantitatibo garrantzitsua emango dizkie erabakiak hartzen dituztenei.

Hauexek dira tresnaren ezaugarri nagusiak:

• • Energia, ekonomia, gizartea eta ingurumena uztartzen dituen ikuspegi integratua.
• • Industria-sektoreari arreta berezia ematen dion sektore anitzeko modelaketa.
• • Ekonomia Zirkularraren eta Bizi Zikloaren Azterketa ikuspegia zein Adimen Artifizialeko (IA) teknikak txertatzea.

Horrela, BIDERATUk teknologien eta sistemen osagai energetiko eta ekonomikoak ardatz dituen modelaketaren core-a garatu, eta analisiaren sakontasuna nabarmen hobetuko dituzten zenbait alderdi metodologiko gehituko dizkio: industria-sektorearen karakterizazio desagregatua, jasangarritasuna ebaluatzeko metodologiak eta ekonomia zirkularreko estrategien diseinua, eta IAko teknikak.

Eusko Jaurlaritzako Ekonomiaren Garapen, Jasangarritasun eta Ingurumen Sailak (ELKARTEK 2021 programa) finantzatutako proiektu honek 500k€ inguruko aurrekontua du, eta 2022ko abenduan amaituko da.

BIDERATUren egiturak zortzi jarduera-bloke edo Lan Pakete (LP) ditu, ondoko eskeman ikus daitekeenez.

• 1. LP. BIDERATU Modelizazio Sistema Integratuaren diseinu kontzeptuala

• Liderra: BC3
• Kontaktua: Iñaki Arto; 944 014 690.

Lan-pakete honek BIDERATU Modelizazio Sistema Integratuaren diseinu kontzeptuala du ardatz, baita sistema osatzen duten eredu nagusien integrazioa ere.

Jarduera nagusiak:

• • Modelizazio-sistema integratuaren goi-mailako egitura diseinatzea, kontuan hartu beharreko ezaugarri eta funtzionaltasun nagusien identifikaziotik abiatuta.
• • Modelizazio-sistema integratua osatzen duten osagai nagusiak (ereduak, moduluak, metodologiak, etab.) integratzea, horien garapen homogeneorako modelizazio-esparru bateratua ezarriz eta integraziorako behar diren metodoak, algoritmoak eta interfazeak garatuz.

• Liderra: TECNALIA
• Kontaktua: Eneko Arrizabalaga; 944 430 850.
  

Lan-pakete honek energia-sistemaren modelaketa zehatza egitea du helburu, horri atxikitako sektoreak bereizik: Industria, zerbitzuak, garraioa, bizitegiak, transformazioa eta banaketa, energiaren inportazioak eta esportazioak, etab. Modelaketa honen bitartez, abiapuntuko egoera ez ezik, energia arloko eskaeren eta kontsumoen bilakaera eta deskarbonizaziorako giltzarrizkoak diren teknologien eta bektore energetikoen bilakaera ere islatuko dira.

Jarduera nagusiak:

• • Eskualde mailako sektore anitzeko energia-eredua eraikitzea, sektore bakoitzean bottom-up eredu mikro-espezifikoak garatuz eta integratuz. Energia arloko balantzeak egiteko aukera emango duten kalkulu-parametroak eta algoritmoak definitzea, sektoreetako energia-eskarien arteko erlazioa txertatuz.
• • Energiari buruzko epe ertain eta luzeko proiekzioak sortzeko algoritmoak garatzea, denbora-serieak eta erregresio-ereduak Adimen Artifiziala - Machine Learninga (IA-ML) ardatz duten tekniken bitartez aztertuz, proiektatu nahi diren aldagaien arteko korrelazioak eta hauen balizko driverrak identifikatu ahal izateko.
• • Energiaren eskualde mailako modelaketa prospektiboan bizi-zikloaren ikuspegia eta ekonomia zirkularraren kontzeptua integratzea.

• 3. LP. Euskadiko industria-sektorearen karakterizazio integrala, trantsizio energetikoaren, ekonomia zirkularraren eta jasangarritasunaren ikuspegitik

• Liderra: MU-EPS
• Kontaktua: Joan Manuel Fernandez; 943 794 700.

Lan-pakete honen bitartez, Euskadiko industria-sektorearen analisi integrala egingo da, industriaren CO2 isurpenak nabarmen murrizteko giltzarrizko prozesu eta teknologiak identifikatu ahal izateko.

Lan-pakete honen garapenak eta ebaluazioak zehaztuko dituen berariazko moduluan, industria-sektorea desagregatu eta 2. Lan Paketean garatutako sektore anitzeko modelaketan txertatuko da, industriak lan-pakete horretan duen karakterizazioari xehetasun handiagoa emanez.

Jarduera nagusiak:

• • CO2 isurpen-mailaren ikuspegitik Euskadin giltzarrizkoak diren industriak identifikatu eta karakterizatzea.
• • Funtsezko industrien prozesuak, jarduerak eta balio-kateak bereizita karakterizatzea.
• • Energia-eraginkortasun, deskarbonizazio, ekonomia zirkular eta jasangarritasunaren arloko joera teknologikoak, negozio-ereduak eta industria-agertokiak sailkatzeko taxonomia garatzea.
• • Ekonomia zirkularraren eta industria-jasangarritasunaren adierazleak identifikatu, definitu eta karakterizatzea.

• 4. LP. Sektore anitzeko eredu makroekonomikoaren garapena

• Liderra: BC3
• Kontaktua: Iñaki Arto; 944 014 690.

Euskadiko sektore anitzeko eredu makroekonomikoa garatzea da lan-pakete honen helburua, deskarbonizazioaren inguruko politika eta bide desberdinen eragin sozioekonomikoak aztertzen lagunduko duen Input-Output ikuspegi dinamiko ekonometriko baten bitartez.

Hartara, Euskadiren 2050erako Klima Aldaketaren Estrategia ebaluatzeko BC3k garatu duen DERIO eredua eguneratu eta sakonduko da, etxeen modulua hedatuz, Sektore Publikoaren modulua garatuz, energiaren erabilera eta ekoizpenaren irudikapena hobetuz eta nazioarteko merkataritza modelizatuz.

Jarduera nagusiak:

• • Etxeen modulua garatzea, Euskadiko biztanleria ordezkatzen duten 2.000 etxetako errenta, aberastasuna eta kontsumoaren modelizazioa barne hartuz.
• • Enpresen modulua garatzea, Input-Output ikuspegi baten bidez 88 sektore eta 105 produkturen portaera deskribatzeko gai izan dadin, ekoizpen arloko egiturak ekoizpen arloko faktoreen eskariarekin lotuz (kapitala, lana, energia eta beste bitarteko batzuk).
• • Sektore Publikoaren modulua garatzea, gobernuaren kontuen osagaiak eredu ekonomikoaren beste zati batzuekin lotuz, etxe eta enpresekiko interakzioak deskribatzen dituzten ekuazioen bitartez.
• • Eredu makroekonomikoa integratu eta baliozkotzea.

Visión simplificada del modelado macroeconómico en BIDERATU 

• 5. LP. Trantsizio energetikorako bideen definizioa eta erabakiak hartzeko laguntza

• Liderra: TECNALIA
• Kontaktua : Eneko Arrizabalaga; 944 430 850.

Lan-pakete honek energia-trantsiziorako bideak modu egituratu eta koherentean definitzeko metodologia garatzea du helburu, eta horretarako, oinarritzat hartuko ditu IA-MLren bidezko sorkuntza automatizatu eta masiboa eta ebaluatutako energia-trantsiziorako bideak lehenesteko irizpideen haztapena.

Jarduera nagusiak:

• • Irizpide anitzeko erabaki-analisian (MCDA) oinarrituta erabakiak hartzen laguntzea xede duten egungo metodoen azterketa kritikoa.
• • MCDAn eta IAn oinarritutako metodo aurreratu berria garatzea, erabaki-hartzearen prozesua hobetzeko.
• • Deskarbonizaziorako bideak sortu eta ebaluatzeko algoritmoak diseinatzea, sektore bakoitzari aplikatutako teknologien eta estrategien aldi bereko konbinazioa kontuan hartuz.

• 6. LP. Karbono gutxiko euskal ekonomia zirkular baterantz 2050erako: industria-sektorearen trantsizio energetikorako balizko bideen azterketa

• Liderra: ENERGIA KLUSTERRA
• Kontaktua: Jose Ignacio Hormaeche; 944 240 211.

Modelaketa integratuko ingurunearen kontzeptua probatzea da lan-pakete honen helburu nagusia, eta horretarako, industria-sektorearen deskarbonizazio jasangarri eta lehiakorrerako hainbat bideren simulazioa egingo da Euskadik 2050erako karbonoan neutroa den ekonomia zirkularrera egin beharreko trantsizio energetikoaren testuinguruan, tresnaren emaitzak ebaluatu eta baliozkotu ahal izateko.

Jarduera nagusiak:

• • Ereduari atxikitako bilakaera-agertokiak simulatzeko behar diren testuinguruari buruzko informazioa eta datu guztiak aztertu eta biltzea.
• • Datuak tresnan sartu eta hiru eredu nagusiak doitzea: sektore anitzeko energia, makroekonomikoa eta deskarbonizazio bideak sortu eta erabakiak hartzeari dagokiona.
• • Euskadiko industria-sektorea 2050erako deskarbonizatzeko bide alternatiboak zehaztea, neurri, jarduketa eta teknologia alternatiboei dagokienez.

• 7. LP. Komunikazioa eta zabalkundea 

• Liderra: CLUSTER DE ENERGÍA
• Kontaktua: Jose Ignacio Hormaeche; 944 240 211.

Proiektuan izandako aurrerapenak eta emaitzak komunikatzeko estrategia definitu eta abian jartzea da 7. Lan Paketearen helburu nagusia, identifikatutako intereseko taldeen artean ahalik eta ikusgarritasunik handiena izan dezan, garatutako ezagutzaren eta teknologien transferentzia bultzatzeaz gain.

• 8. LP. Proiektuaren koordinazio orokorra

• Liderra: TECNALIA
• Kontaktua: Eneko Arrizabalaga; 944 430 850.

BIDERATU proiektuaren kudeaketa tekniko eta ekonomikoa gauzatzea da lan-pakete honen helburua.