Offshore aerosorgailuak lehorrean erabiltzen direnak baino handiagoak dira, eta gero eta ur sakonagoetan instalatu ohi dira. Alabaina, sakonera jakin batetik aurrera (30-40 metro), itsas hondorako zimendatze finkoak ez dira bideragarriak ikuspuntu ekonomikotik. Horren aurrean, enpresa askok ur gaineko egituretan oinarritutako zimendatze-soluzioak ikertzen eta diseinatzen dihardute etorkizuneko aerosorgailuetarako.

Aerosorgailuak ur sakonetan zimendatzeko dauden teknologia eta soluzioen gaur egungo egoera zehazteko asmoz, Euskadiko Energia Klusterrak eta Euskal Herriko Itsas Foroak "Offshore eolikoaren erronkak: zimendatzeen diseinua eta fabrikazioa" izenburuko workshopa antolatu dute gaur Donostiako Kursaal jauregian, Euskadiko eta Akitaniako enpresa eta erakundeen parte-hartzeaz.
Topaketan, José Ignacio Hormaeche Energia Klusterreko zuzendariarekin batera, Nantesko École Centrale, Scottish Development International deritzon Eskoziako sustapen-agentzia publikoa eta Iberdrola, Gamesa/Adwen, Valorem, Eolink, Nautilus, Saitec eta Esteyco konpainien ordezkariak bildu dira.

'From seanergies to seanergy'

Jardunaldia "From seanergies to seanergy" delako ekimenari atxikita gauzatu da. Hauxe da, Akitania-Euskadi Euroeskualdearen "Euroeskualdeetako lankidetza estrategikoak 2015" deialdiaren barruan aukeratu ziren lau proiektuetako bat. BlueSign-ek eta Energia Klusterrak koordinatutako proiektu honen bidez, Akitaniak eta Euskadik itsas-energiak garatzeko darabiltzaten estrategiak sendotu nahi dira, mugaz gaindiko lankidetza bultzatuz.

Bi eskualdeen lehiakortasuna hobetzea da ekimen honen helburu nagusia, euroeskualdeetako eragileen artean gauza daitezkeen itsas-energien esparruko lankidetza-aukerak identifikatuz.

Ekimen honen barruan, lau tailer tematiko osagarri eskainiko dira. Horietako bi, logistika eta portu-azpiegiturak, eta itsas-energia berriztagarriei buruzko ikerketa aztergai dituztenak, Baionan eta Bordelen egin dira dagoeneko. Gaur Gipuzkoako hiriburuan antolatu dena hirugarrena da, eta laugarrena, olatuen eta itsas-korronteen energiari buruzkoa, Bilbon egingo da maiatzaren 3an.

Workshop hauek topagune ezin hobea eskainiko diete bi eskualdeetako enpresei esparru bakoitzari dagozkion proiektuak aurkeztu eta esperientziak trukatzeko. Gainera, lau tailer tematiko hauek mugaz gaindiko ekimen honetako ekitaldi nagusia prestatzen lagunduko dute: Seanergy 2016 azoka, ekainaren 1etik 3ra Biarritzen antolatuko dena. Bertan, itsas-energiei buruzko nazioarteko azoka eta hitzaldi-programa zabala eskainiko dira.

Workshopen argazki galeria: