Topaketa Eusko Jaurlaritzak eta Orkestrak koordinatutako agendaren barruan antolatu da, Energia Departamentuko (DoE) Idazkariordea Ahmed Mohammed Belajer Al Rumaithi buru zuen emiratiar ordezkaritzak Euskadira egindako bisitari begira. Energia Klusterrak hamaika euskal enpresen elkarrizketa eta parte-hartzea dinamizatu ditu hiru saio tematikoetan, Sare Adimendunei, Energia Berriztagarriei eta Hidrogenoari helduz, hurrenez hurren.

Hiru saioen hasieran, José Ignacio Hormaeche Energia Klusterreko Zuzendariak sarrera-hitzaldia egin zuen klusterraren jarduera aurkezteko eta jorratutako gaiekin lotuta dauden balio-kateen osaera azaltzeko.

Sare adimendunei buruzko saioan, Iberdrola, Ariadna Grid/Merytronic, ZIV eta Tecnalia enpresen ordezkariek parte hartu zuten, eta sareko aktibo eta zerbitzuen digitalizazioari erreparatu zioten nagusiki, trantsizio energetikoaren ardatz egituratzailea den aldetik, zibersegurtasuna eta erregulazio-ingurune egokia izateko premia funtsezko erronkatzat hartuta.

Gamesa Electric, Idom, Ingeteam eta Meteo For Energy enpresen ordezkariek energia berriztagarriei buruzko saioan parte hartu zuten, eguzki-energiaren arloko ordezkarien interesa piztuz. Kasu honetan, eztabaidak biltegiratzea eta kostuen murrizketa izan zituen ardatz, energia berriztagarrien hedapena errazteko elementu kritikoak diren heinean.

Hirugarren eta azken saioan hidrogenoa izan zuten hizpide, hedapen-prozesuan dagoen bektore energetikotzat, eta Petronor, Sener eta Tubacexen ordezkariek parte hartu zuten. Zehaztutako elektrifikazio-ibilbiderik ez duten segmentu espezifikoetarako aplikagarritasuna baloratu zuten, eta iturri berriztagarrietatik sortutako elektrizitate merkea eskuratzeko beharra identifikatu zuten, hidrogenoaren arloko inbertsioa sustatzeko elementu kritikotzat.

Topaketari amaiera emateko, DoEko Idazkariordeak eta Energia Klusterreko Zuzendari Nagusiak elkar ulertzeko memoranduma sinatu zuten, bi erakundeen arteko lankidetza aldizkako jarraipen-bileren bidez sustatzeko asmoz.