Uztailaren 8an eta 9an offshore energia eolikoari buruzko jardunaldia antolatu zuten Kitakyushun CDTIk eta NEDOk Energia Klusterraren lankidetzaz, eta bertan, bederatzi euskal erakundek azkenaldiko aurrerapen nagusiak Japoniako sektorearen ordezkarien aurrean aurkezteko aukera izan zuten.

Uztailaren 4an eta 5ean, Energia Klusterrak, EVEren lankidetzaz eta HWS eta SAITEC OFFSHORE enpresak aldean zituela, Fukushimako prefekturarako misio batean parte hartu zuen, bi eskualdeen arteko lankidetza teknologiko eta enpresariala garatzen lagun dezakeen elkarren ezaupidea sustatu eta loturak estutzeko

Frantzian antolatzen den itsas energien sektoreko urteko azokarik handienak, Seanergy 2019 delakoak, mundu osoko 200 erakusketari eta 2.000 parte-hartzaile baino gehiago bildu ditu. BIMEPek, DITRELen eta Energiaren Euskal Erakundeak erakusketari gisa parte hartu dute Energia Klusterrarekin batera, ‘Wave Energy Basque Country’ markari atxikitako standean.

Ekainaren lehenengo astean, hilaren 3tik 7ra bitartean, energia sektoreari lotutako Kolonbiako enpresa eta erakundeen ordezkaritza batek Euskadi bisitatu du, euskal industriak energia eraginkortasunean nahiz energia berriztagarriak matrize energetikoan txertatzeko ahaleginean bildu duen esperientzia eta ezagutzaren berri ikasteko. Energia Klusterrak ekainaren 3an antolatutako jardunaldian, Kolonbiako eta Euskadiko enpresek sektoreari buruzko esperientziak eta iritziak trukatu zituzten, eta amaitzeko, guztien arteko harremanak sustatzeko networking saioa egin zuten.

Energia Klusterrak koordinatutako zortzi euskal erakunderen ordezkaritza batek mugikortasun elektrikoaren munduko topaketarik handiena den EVS32 deritzonerako misio batean parte hartu zuen Frantziako Lyon hirian, maiatzaren 20tik 22ra bitartean. Misioa Gipuzkoako Foru Aldundiak bultzatutako Smart Mobility Industry Programaren barruan antolatu zen.

Energia Klusterrak, ELBE proiektuan bazkide duen con Offshore Västekin batera, Suediako itsas-energia berriztagarrien sektoreko giltzarrizko erakundeetarako bisitak eta enpresa hauekiko zein beste parte-hartzaile batzuekiko B2B bilerak tarteko zituen jardunaldia antolatu zuen maiatzaren 21ean. Göteborg hirian egindako ekitaldian, ELBE proiektuari atxikitako Europako herrialdeetako (Suedia, Eskozia, Danimarka eta Belgika) 50 erakundek baino gehiagok parte hartu zuten, jardunaldia areago aberastu zuten euskal erakundeekin eta Norvegiako erakundeekin batera.

Hamar euskal erakunderen ordezkariek, Energia Klusterrarekin batera, Alemaniara antolatutako misio batean parte hartu dute “The Smarter E Europe” topaketan parte hartzeko. Horren barruan antolatzen dira, besteak beste, EES eta Intersolar azokak, energia-biltegiratzearen nahiz energia fotovoltaikoaren arloetako mundu mailako erreferenteak. Misioa Gipuzkoako Foru Aldundiak bultzatutako Smart Mobility Industry Programaren barruan antolatu da.

Energia Klusterrak esplorazio-bidaia egin zuen Pazko astean Txileko Santiagora Space2IDGO deritzon proiektuaren barruan. Europako klusterren arteko proiektu honen bitartez, sektore aeroespazialeko enpresentzako (droneak dituzten enpresak, energia berriztagarrietako parkeen O&M jardueretarako satelite bidezko tresnak erabiltzen dituzten enpresak, etab.) aukerak bilatu nahi dira energia sektorean. Energia Klusterrak bilerak antolatu zituen energia sektoreko hainbat eragilerekin, herrialdearen egoera egiaztatzeko eta energia sektoreko enpresek Txileko ekipamendu eta instalazio energetikoen hobekuntzarako aplikazio teknologikoetan izan ditzaketen aukerak aztertzeko.

Energia Klusterrak Energiari buruzko Tailerra antolatu zuen Intergune+ topaketaren barruan BT&Ien (Basque Trade & Investment) lankidetzaz, energia sektoreko enpresa txiki eta ertain berritzaileen nazioartekotzea aztertzeko. Euskadiko Nazioartekotzearen Foroa maiatzaren 6 eta 7an egin zen BECen, euskal enpresek nazioartekotze-prozesuan aurrera egiteko dituzten zerbitzuak, finantzabideak eta laguntzak ezagutzera emateko eta Nazioartekotzeko Euskal Agentziaren Kanpoko Sarearen ordezkariekiko topaketak errazteko.

WindEurope 2019 azokak BECen egin duen astebeteak aukera ugari eskaini dizkie bertaratutakoei. Azoka bisitatzeaz gain, zenbait erakundek Euskadiko sektore eolikoaren giltzarrizko instalazioak ezagutzeko aukera izan dute. Apirilaren 4an, Energia Klusterrak tour txiki bat antolatu zuen Wind Energy Basque Country pabilioiari atxikitako zenbait standetan zehar Afrikako herrialdeetatik etorritako erakundeentzat, eta biharamunean, Bilboko Portuko enpresak bisitatu zituen herrialde horietako eta Europako zenbait eskualdetako erakundeekin batera.