Energia Klusterra buru duen Interes Azalpen honek elektrizitate-sareak digitalizatzeko soluzioen eta biltegiratze-sistemen garapena izango du ardatz, banaketa-sareek kudeaketa eta eragiketarako tresna diren aldetik, elektrizitate-sisteman iturri berriztagarrien integrazio gero eta handiagoak ekarriko duen erronkaren harira.

Berreskuratze, Eraldaketa eta Erresilientziaren Planaren barruan, bidezko trantsizio energetiko inklusiboaren azelerazioa funtsezkotzat jo da ekonomiaren susperraldirako eta ekonomia-eredu iraunkorragoa eta erresilienteagoa berreraikitzeko. 2021-2030eko Energiaren eta Klimaren Plan Nazional Integratuak (PNIEC) eta 2050eko Epe Luzeko Deskarbonizazio Estrategiak (ELP) hazkunde handia aurreikusi dute elektrizitatearen sorkuntza berriztagarrian, eta horren ondorioz, nahitaezkoa da egungo energia-sistema zentralizatu eta norabide bakarrekoa aldatu eta norabide anitzeko sistema banatu, adimendun eta malgua ezartzea, biltegiratzea eta malgutasun-zerbitzuak garatuz, eta sareen digitalizazioa, biltegiratzea, eskariaren kudeaketa eta bestelako tresnak erabiliz.

Planaren eraginkortasuna bermatzearren, MITECOk ezinbesteko informazioa biltzea xede duen deialdi hau zabaldu du, eta honen bitartez, hala badagokio, Gobernuak modu autonomoan jarduera-ildo estrategikoak eraiki eta garatu ahal izango ditu energia-sistema osoaren malgutasuna modu lehiakor eta iraunkorrean hobetzeko esparruetan, bereziki sare adimendunen arloan eta energia-biltegiratzearen hedapenean, datozen urteetarako aurreikusi den sorkuntza berriztagarriaren hazkunde handiari babesa emanez.

Ildo horretan, EKEk lankidetza bidezko ekimen eta proiektuetarako proposamenen prestaketa dinamizatzen eta laguntzen jarraituko du, enpresei “Next Generation EU” funtsetarako sarbidea errazteko, datozen hilabeteetan zehaztuko diren diren mekanismoen bitartez.