Euskal ekimena Nazio Batuen Klima Aldaketari buruzko Glasgowko 2021eko Konferentzian (COP26) aurkeztu zen eta WEFek sustatutako Transitioning Industrial Clusters towards Net Zero programaren eskualde mailako lau proiektuetako bat da. Industriaren trantsizioa bultzatu eta 2050ean zero isurpen garbi lortzea du helburu, WEFek definitutako lau garapen-eremuei helduz: energia-eraginkortasuna, elektrifikazio berriztagarria, hidrogenoa eta CO2aren atzipena. Era berean, esperientziak eta jardunbide egokiak eskaini nahi zaizkie beste eskualde batzuei, trantsizio horren aldeko konpromisoak har ditzaten.

Arantxa Tapia Sailburua buru, bileran izan ziren Mikel Amundarain Industria Ssailburuordea, Ana Camacho Industria eta Trantsizio Energetikoko Zuzendaria, Iñigo Ansola EVEko zuzendari nagusiak eta Aitor Urzelai SPRI Taldeko Zuzendaria, baita Petronor eta Iberdrola ere, ekimenaren bultzatzaile bezala, zenbait sektoreren ordezkariekin batera: fintze-sektorea (Energia Klusterra), zementugintza (Aclima), siderurgia (Siderex), galdaketa (AFV) eta papergintza (Euskadiko Paperaren Klusterra).

Lehenengo fasean, 2022ko apiriletik 2023ko apirilera bitartean, diseinatutako lan-planak Euskadin CO2 gehien isurtzen duten sektoreak izango ditu ardatz, hainbat lan-eremutan egituratuta. Besteak beste, energia-kontsumo handiena duten industria-prozesuen identifikazioa, prozesu horiei lotuta CO2 emisioak murriz dezaketen teknologien eta neurrien zehaztapena, Euskadiko egungo zein balizko balio-katearen ebaluazioa, identifikatutako teknologiak eta neurriak garatu eta eskaintzeko gai ote den, eta aztertutako industria-prozesuetan aplika daitezkeen soluzio teknologikoen balizko proiektu pilotuen edo demostrazio-proiektuen definizioa.

Energia Klusterrak berariaz nabarmendu zituen euskal energia-sektoreak industriaren deskarbonizazioaren erronkari aurre egiteko dituen gaitasunak, eta ekimen honek energiaren sektoreko balio-kateari teknologia eta zerbitzu berritzaileak garatzeko eskaintzen dizkion aukerak azpimarratu zituen.