Apirilaren 15ean, hirugarren workshopa antolatu zen Bilbao Innovation Atelier deritzonaren barruan, hauxe baita hiriko trantsizio energetiko eta klimatikoan inplikatutako eragileen eta intereseko taldeen ekarpenak bideratzeko Bilboko Udalak ATELIER proiektuko euskal bazkideen lankidetzaz definitu duen parte-hartze bidezko tresna.

Tailerra Tecnaliak koordinatu zuen hainbat udal sailen parte-hartzeaz, eta formatu birtualean egin zen, ondoko helburu nagusi hauek lortzeko asmoz:

• ATELIER proiektua aurkeztea Bilboko trantsizio energetikoan eta deskarbonizazioan inplikatutako tokiko zein eskualdeko eragile-multzo bati.
• Eragile hauek ezagutza-taldeen arabera antolatzea, Bilboren 2050eko ikuspegiaren diagnostikoan zein baterako garapenean izango duten parte-hartzea bideratzeko.
• Tokiko zein eskualdeko eragileek partekatutako AMIA formatuko diagnostiko sektoriala lortzea, prozesuaren ondoko pausoak sustatzeko.

Horretarako, Tecnaliak eta Energia Klusterrak tailerra aurkeztu eta dagokion testuinguruan kokatzeko zuzendu zuten hasierako saioaren ondoren, parte-hartzaileak 6 lan-mahai tematikotan banatu ziren, hiriaren diagnostikoa hainbat ikuspegitatik lantzeko: Gobernantza eta gizartea, Energia, Eraikuntza, Mugikortasuna, Klima Aldaketa eta Digitalizazioa.

Energia Klusterrak Energia Mahaia koordinatu zuen Tecnaliaren laguntzaz eta Bilboko Udala, EVE, Iberdrola, Telur, Sener, Velatia eta Goienerren partaidetzaz. Bertan landutako gaien artean, beren-beregi nabarmendu zen sorkuntza arloko teknologia berriak (truke geotermikoa, eguzki-energia fotovoltaikoa, mikroeolikoa edota hondakinen balorizazioa) erabiltzeak Bilbori ekarriko dion aukera, baita ekonomia suspertzeko planek Europa, Estatu zein eskualde mailan lortu duten funtsezko babesa, eskari energetikoa elektrifikatzearen aldeko arau-esparrua eta autokontsumo kolektiboaren zein Tokiko Energia Komunitateen ezarpen gero eta handiagoa ere.

Era berean, Zorrotzaurrek, ATELIER proiektuaren barruan, energia-eraginkortasunaren arloko soluzio berritzaileak (adibidez, bero-sarea, eguzki-energia fotovoltaikoa, etab.) baliozkotzeko esperimentazio-azpiegituratzat duen potentziala nabarmendu zen, itsasadarrak bektore energetikotzat duen potentzialarekin batera.

Parte-hartzaileek balorazio positiboa egin zuten topaketari buruz, eta Bilbao Innovation Atelier delakoaren barruan Bilboren 2050eko ikuspegi energetikoaren garapenari buruz antolatuko diren hurrengo tailerretan ATELIER proiektuko bazkideekin lankidetzan jarduteko prest agertu ziren.